|
|
Breve
Grammatica de Interlingua
|
Le presente synopse se basa super le grammatica de
interlingua publicate per IALA in 1951. Le obras fundamental de IALA, Interlingua - English Dictionary
e Interlingua Grammar, es in vendita per le Servicio
de Libros.
Le articulo:
Le articulo definite es LE in omne casos (sin
distinction de genere o numero). Con le prepositiones de e a precedente lo, illo se funde in le formas DEL e AL.
Le articulo indefinite es UN (anque sin distinction de genere).
Le substantivo:
Le plural del substantivos se termina in -S o (pois consonantes) in -ES. Un -C final del singular appare como -CH-
in le plural.
Le adjectivo:
Le adjectivo es invariabile. Su forma non indica
concordantia con le substantivo o pronomine modificate per illo. Su position es post o ante le substantivo a que
illo pertine.
Le adverbio:
Le adverbio es derivate del adjectivos per medio
de adder -MENTE (o post un -C final del adjectivo, -AMENTE). Le adverbios radical non formate de un adjectivo multe
vices termina in -O o -E.
Le comparation:
Le grado comparative de adjectivos e adverbios
es exprimite per PLUS. Le grado superlative per LE PLUS. Grados de inferioritate es similemente exprimite per MINUS
e LE MINUS.
Le pronomines personal:
Le pronomines personal, excepte le prime e secunde
persona plural, ha duo distincte formas usate respectivemente como subjecto e objecto (tanto ben directe como anque
indirecte). In omne tertie personas le formas subjective funge anque como objectos de prepositiones. - IO VOS CONNECTE
CON ILLE.
Le adjectivos possessive:
Le adjectivos possessive, excepte in le prime
e secunde persona plural, ha formas con e sin -E final. Le plus breve formas occurre immediatemente ante le substantivos
modificate per illos. In uso pronominal le formas plus longe es le sol correcte. - ILLE HA LOR ADRESSE E LE MIE.
Le verbo:
Le verbo ha un infinitivo (terminante in -AR,
-ER, o -IR) que se usa anque como substantivo e duo participios (presente: "-ANTE", "-ENTE",
"-IENTE" e passate: "-ATE", "-ITE" ) que se usa anque como adjectivos. In su conjugation
il non ha terminationes personal ma un complete serie de tempores ( passato: -VA. perfecto: HABER + , plusquamperfecto:
HABEVA +, futuro: -RA, conditional: -REA) tanto ben active como passive. Illo ha un imperativo (sin le -R del infinitivo),
ma nulle conjunctivo (excepte SIA de ESSER).
Le orthographia e pronunciation:
Le litteras es illos del alphabeto standard roman
sin signos de accentuation o altere diacriticos. Le pronunciation, in general, es "classic" (vocales
como in espaniol, italiano, e germano moderne; C ante E, I, Y, como un S o TS, in altere casos como K; TH como
T; PH como f; etc.). Le accentuation es "natural". Le plus frequente le accento cade super le vocal precedente
le ultime consonante.
|
